وفاة فنان مصري بعد مشاجرة مع فرد أمن أمام إحدى المستشفيات

توفي الفنان تامر ضيائي إثر مشادة كلامية نشبت مع فرد أمن مستشفى السرطان بمنطقة التجمع الأول تطورت لمشاجرة، صفع على إثرها الفنان فرد الأمن على وجهه، ليرد له الأخير الصفعة، وبعد ذلك حاول الفنان الانصراف لكنه أصيب بالإغماء أمام المستشفى، وتوفي في الحال.

وكشفت مصادر أن زوجة الفنان مريضة بسرطان الثدي، وتوجه اليوم الفنان رفقة زوجته إلى مستشفى السرطان لعمل جلسة كيماوي، وطلب الفنان من فرد الأمن الدخول قبل الموعد المصرح به، وهذا ما رفضه فرد الأمن، وعلى إثر ذلك وقعت مشادة كلامية بينهما، قام على إثرها -ضيائي- بصفع فرد الأمن على وجهه، ما أثار غضب الأخير ليرد له الصفعة، ليتدخل الحاضرون لفض الاشتباك بينهما قبل مغادرته المكان، وقبل وصوله إلى بوابة المستشفى الأخرى أصيب بحالة إعياء فقد على إثرها وعيه ولدى نقله إلى المستشفى لإسعافه تبين وفاته.

وتلقت أجهزة الأمن بالقاهرة إشارة من أحد المستشفيات باستقباله الفنان تامر ضيائي، متوفيا إثر تعرضه لهبوط في الدورة الدموية.

وعلى الفور تم انتقال قوة أمنية إلى مكان البلاغ للوقوف على ملابسات الواقعة كاملة، وبالفحص والمعاينة تبين وقوع مشاجرة بين ضيائي وفرد أمن إداري بمستشفى السرطان نطاق قسم شرطة التجمع الأول، توفي الفنان، على إثرها، وتحرر عن ذلك المحضر اللازم بالواقعة، والتحويل للعرض على النيابة العامة للتحقيق.

فيما قالت الزوجة إن زوجها الفنان تامر ضيائي له تاريخ مرضي وهو مريض قلب، وأجرى قسطرة قبل 3 أشهر، وكان من المقرر له إجراء عملية تركيب دعامتين بالقلب كما سبق أن أصيب بجلطة.

وتأتي وفاة تامر ضيائي، بعد مرور نحو شهرين على ترك وصيته عبر حسابه الشخصي على "فيس بوك"، حيث قال: "بوست وصية ده هيفضل باين على صفحتي لحد ما أموت. الحقيقة اللي كلنا عارفينها ومتأكدين منها إننا كلنا ربنا كتبلنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل، وأنا مش عايز حد يعملها لمجرد إنها معروفة، ووقتها طبعاً مش هعرف أقولها لحد".

واستعرض تفاصيل الوصية، بقوله: "صلاة الجنازة أهم من العزاء، وهي اللي كل ما العدد زاد كل ما ثوابي ما كان أكتر، فأرجوكم تصلوا عليا. مش شرط تيجي العزاء ويا ريت لو اتعمل في البيت أو مكان بسيط بفلوسه تطلعولي صدقة جارية أفضل، من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللي هتقروا فيه جزء فضوا نفسكم واقعدوا ادعوا فيه".

وتابع: "بلاش صدقة جارية تقليدية وسهلة، ومش مستفاد بيها، يعني المصاحف كتير في مصر أوي وكل بيت فيه كتير، فممكن نحط الفلوس في جامع بيتبني أو كرسي متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة. دي نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا، وابيضت عيناه من الحزن فهو كظيم".

وأضاف الفنان تامر ضيائي، قائلاً: "أهم حاجة تاني هي الدعاء وبس والصدقة. من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال، لأن ده أهم وقت ليّا ويا ريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني في ليلة زي دي. الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هوّنوه على نفسكم بالدعاء ليّا عشان أبقى في سعادة لحد ما أقابلكم تاني. اللي بيحبوني يدعولي كتير عشان لو مفيش حد يدعيلي، ودي مهمة أوي أوي أوي، عاوز الكل يسامحني على أي حاجة عملتها فيه بقصد أو بدون قصد".

يُذكر أن تامر ضيائي، شارك في موسم دراما رمضان الماضي، من خلال مسلسل "فراولة" بطولة الفنانة نيللي كريم، وسبق وشارك في عشرات المسلسلات والأفلام، منها مسلسل "عملة نادرة"، "إلا أنا"، "قصر النيل"، "النهاية" بطولة يوسف الشريف، "زلزال" مع محمد رمضان، "بركة" مع عمرو سعد، "رسايل" مع مي عزالدين، و"هربانة منها" مع ياسمين عبدالعزيز وغيرها.